Apt-get Update වලදි GPG Error එකක් එනවද? | Fixing Apt-Get Update GPG Error

උබුන්ටු මෙහෙයුම් පද්ධතිය තුලදි යාවත්කාලීන කිරීම වලට භාවිතා වෙන්නේ apt-get update විධානය. මේ විධානය ලබා දුන්නට පස්සේ කලින් සඳහන් කරලා තියෙන මූලයන්ගෙන් අවශ්‍ය පැකේජ version පරීක්ෂා කරලා බලලා බාගත කරගෙන ඒවා ස්ථාපනය කරන එක. Apt වගේ පැකේජ කළමණාකරන පද්ධතියකින් ඇති වැඩිපුර වාසිය වෙන්නේ අවශ්‍ය dependencies හොයලා බලලා ඒවාත් ස්ථාපනය කරලා දෙන එක. අනිත් එක මේ වගේ අපිට මූලයන් සඳහන් කරන්න පුලුවන්.

මේ පැකේජ නිර්මාණය කරන අය ඒවා තමන්ගෙම කියලා සඳහන් කරන්න පාවිච්චි කරන්නේ Digital signing කියන ක්‍රමවේදය. මෙතනදි පාවිච්චි වෙන්නෙ PKI (Public Key infrastructure) කියන ආරක්ෂක තාක්ෂණය. සාමාන්‍යයෙන් GNU ආශ්‍රිත වැඩ වලදි මේක හැඳින්වෙන්නේ GPG (GNU Privacy Guard) විදියට. PKI වලදි ධූරාවලික ආකෘතියක් භාවිතා කරනවා. GPG වලදි භාවිතා වෙන්නේ වෙබ් (ජාලගත) ආකෘතියක්. මේ ආකෘතිය යටතේ Key වර්ග දෙකක් තියෙනවා. එකක් ප්‍රසිද්ධියේ ලබා ගන්න පුලුවන් Public Key එක. අනිත් එක භාවිත කරන්නා ලඟ ප්‍රවේශමෙන් තබා ගන්න ඕන වෙන් Private Key එක.

Apt-get update මගින් පැකේජ බාගත කරද්දී ඒවා අව්‍යාජ ද කියලා බලන්නේ ඒ පැකේජ වල Public Key එක ආධාරයෙන්. සමහර වෙලාවට මේ Key ආධාරයෙන් කරන පරීක්ෂා කිරීම් වැරදිනම් බාගත කරන එක නවත්තනවා. පහල තියෙන message එකට සමාන ආකාරයේ message එකක් දර්ශනය කරන්න පුලුවන්.

W: GPG error: http://archive.canonical.com intrepid Release: The following signatures were invalid: BADSIG 40976EAF437D05B5 Ubuntu Archive Automatic Signing Key

මේ ප්‍රශ්නය හදාගන්න අපිට පහල විධාන ලබා දීමෙන් කරගන්න පුලුවන්.

sudo apt-get clean

sudo mv /var/lib/apt/lists /var/lib/apt/lists.old

sudo mkdir -p /var/lib/apt/lists/partial

sudo apt-get clean

sudo apt-get update

/var/lib/apt/lists කියන ඩිරෙක්ටරිය ඇතුලේ තියෙන්නේ පැකේජ අඩංගු රිපෝසිටරි (repository) වල නම් සඳහන් ගොනු ලැයිස්තුවක්. මේ ගොනුවක් cat කරලා බැලුවොත් අපිට දකින්න පුලුවන් update අවශ්‍ය වෙන පැකේජ සහ ඒවාගේ version වල ලැයිස්තුවක් (තවත් විස්තර සහිතව) ඇතුලත් වෙලා තියෙනවා කියලා. අපි මේ ඩිරෙක්ටරිය වෙනස් කිරීමෙන් හඟවන්නේ මේවා නැවත සකස් කර ගන්න කියලා. apt-get මගින් එවිට ඒ ගොනු නැවත සාදාගන්නවා.

Apt-get clean මගින් මෙතෙක් කල් බාගත කරලා තියෙන පැකේජ කෑෂ් එකෙන් මකලා දානවා. එතකොට මුල ඉඳන් නැවත අදාල පැකේජ බාගත කරගන්නවා. මුල ඉඳන් බාගත කිරීමේදී කලින් ඇති වෙලා තිබුන අක්‍රමිකතා මැකිලා යන්න පුලුවන්.

Bibliography:

How to fix the Ubuntu GPG Error BADSIG

One thought on “Apt-get Update වලදි GPG Error එකක් එනවද? | Fixing Apt-Get Update GPG Error

Return Fire!