පෞද්ගලික මැදිහත් වීම | Personal Intervention

බැන් කී මූන් ගේ ජල්ලියට එරෙහිව මාස කිහිපයකට එපිටදී විමල් වීරවංස මාරාන්තික උපවාසයක් රඟපා දැක්වූවේය. ලෙමන් පෆ්, අධි පෝෂ්‍ය චොකලට් මධ්‍යයේ ඇදී ගිය එය මහින්ද රාජපක්ෂ ජනාධිපතිවරයා පැමිණ “පෞද්ගලිකව මැදිහත් වී” විසඳා දැම්මේය.  බැන් කී මූන් සිය කාර්යාලයක් ඉවත් කර ගනිමින් පොරත්වය පෙන්වූ අතර ලැබුනු සියලු අපවාද විමල්ගේ ගිනුමට බැර විය.

අඟුලානේදී තරුනයන් දෙදෙනෙක් පොලීස් නිලධාරීන් විසින් මරා දැමුනු අතර ජනාධිපත්වරයා “පෞද්ගලිකව මැදිහත් වී” ඒ පිලිබඳ පියවරක් ගන්නා බව ප්‍රවෘත්ති ප්‍රකාශ වලින් පැවසිණි. ආරංචි වූ හැටියට සිද්ධියට අදාල පොලිස් නිලධාරීන් කිහිප දෙනා මාරු වීමකට ලක් වී තිබිනි.

අවුරුදු එකහමාරකට පමණ පෙර ලසන්ත වික්‍රමතුංග මහ මගදී මරා දැමුනි. සැක සංකා රජය දෙසට එල්ල වීමට ආරම්භ වුනු අතර තමාගේ මිත්‍රයෙකු වූ ලසන්තගේ ඝාතනය තමාට අතිශය පාඩුවක් බවත් තමා “පෞද්ගලිකව මැදිහත් වී” මිනීමරුවන් සොයා ගන්නා බවත් ජනාධිපති මන්දිරයෙන් පැවසිනි. ඝාතකයින්ගේ කවුද යන්න කිසිවක් තවම දන්නේ නැත.

රට තුල මෙවැනි සිදුවීම් වලදී මෑත කාලය තුල වැඩිපුරම අසන්නට ලැබුනේ මෙවැනි “පෞද්ගලික මැදිහත් වීම්”ය. ජනාධිපතිවරයා විසින් මෙලෙස සියලු දේට පෞද්ගලිකව මැදිහත් වීම් අවශ්‍ය වන්නේ අදාල කාර්යය කල යුතු ආයතන වලින් එම කාර්යය සම්පූර්ණ වන්නේ නැති නිසා බව අපට සිතා ගත හැකිය. එසේ නම් විය යුත්තේ එක් එක් සිදුවීමට වෙන වෙනම පෞද්ගලිකව මැදිහත් වීම නොව අකාර්යක්ෂම ආයතන කාර්යක්ෂම ආයතන බවට පත් කර දිගු කාලීන විසඳුම් ලබා දීමය. නමුත් අනිවාර්යයෙන්ම එවැනි පියවර වලින් නිසි ප්‍රතිඵල ලැබීමට කල් ගත වේ. එවිට අදාල පියවර ගැනීමට මුල් වූ සිදුවීමට එකෙනිහිම විසඳුමක් නොලැබෙන අතර ප්‍රසිද්ධියට පත් වෙන්නේ අදාල සිදුවීමට විසඳුමක් නොලැබෙන බවයි. මෙය දිගු කාලීන සැලසුම් මගින් විසඳුම් ලබා දෙනවාට වඩා, ප්‍රසිද්ධිය මත යැපෙන ජනාධිපතිවරයෙකුට, අහිතකර තත්වයකි. ජනතාවට “එක” දා ගත හැකි ක්‍රමය වෙතට එවිට යොමු වන අතර මාධ්‍ය මගින් ජනාධිපතිවරයා රටේ ජනතාවගේ ප්‍රශ්න වලට පෞද්ගලිකව විසඳුම් දෙන ජනතාවට ලෙංගතු සංවේදී මිනිසෙකු බව ප්‍රචාරය කරයි. වැඩේ ගොඩ දා ඇත.

මෙරට ජනතාවට අවශ්‍ය වන්නේ මෙවැනි එදිනෙදා සපුරා ගත හැකි ටොපි බව තේරුම් ගන්නා දේශපාලකයෙකු ඡන්ද ගහ තමන්ට අවශ්‍ය හැටියට සොලවා ගැනීමේ සමතෙකි. නමුත් ඉඳ හිට එම ක්‍රමය නැවත තමන්ටම වැදෙන උරචක්‍රමාලයක් වන බවද තේරුම් ගත යුතුය. පසුගිය දිනෙක නවනගර ශාලාව අසලදී සිදු වූයේ එවැනි සිදුවීමකි. අවුරුදු ගනනාවක් පුරා “පෞද්ගලික මැදිහත් වීම්” ගැන අසා හුරු පුරුදු වී ඇති ජනතාව තම තමන්ගේ එදිනෙදා ජීවිතය තුල ඇති ප්‍රශ්න සඳහාද ජනාධිපතිවරයාගේ පෞද්ගලික මැදිහත් වීම් බලාපොරොත්තුවෙන් සිටියි. දරු උපත් හිඟ වීම් ආදී සිදුවීම් හැර මෙවැනි පෞද්ගලික මැදිහත් වීම් සඳහා ඇති ඉල්ලීම් ජනාධිපතිවරයාට අප්‍රසන්නව බලපානවා ඇත.

රටක් දියුණු කිරීමේදී ජනතාවට ලෙංගතු සමීප සංවේදී නායකයෙකු එලෙස කෙතෙක් දුර යා යුතුද යන්න ලංකාව තුල තත්වය දකින අයෙකු තේරුම් ගත යුතුය. සමහර විට මෙවැනි ගැටලුවක් ඇති වූ පලමු අවස්ථාවේදී “පෞද්ගලික මැදිහත් වීමක්” නොමැතිව අදාල ආයතනය (උදා: පොලිසිය) කාර්යක්ෂම කිරීමේ ක්‍රියාමාර්ගයක් ගත්තා නම් අද මෙම තත්වයට මුහුණ දීමට ජනාධිපතිවරයාට සිදු නොවනු ඇත.

දැන්වත් එවැනි උපාය මාර්ගයකට නොගියහොත් අනාගතය වන විට රටෙන් බාගයක් (දේශප්‍රේමී අර්ධයම විය හැක) තම තමන්ට සොයාගත හැකි කනු මුදුන් වලට නැගී අරලියගහ මන්දිරයට ඇසෙන ලෙස තමන්ගේ දුක් ගැනවිලි අඩඟා කීමට පුරුදු වීය හැක. දේශයේ ආඩම්බරකාර තාත්තාට එවිට තම යුතුකම් එක් එක් දරුවාට වෙන වෙනම ඉටුකර දීමට සිදු විය හැක.

(පින්තූරය : http://colombotoday.com/english/articles/Lite/Protestor-climbs-hoarding-post/15076.htm)

4 thoughts on “පෞද්ගලික මැදිහත් වීම | Personal Intervention

  1. ඇත්ත තමයි එත් ඉතින් අපිට මේක වැටහුනාට , වැටහිය යුතු අයට මේක වැටහෙනවද යන්න ප්‍රශ්නයක්.

Return Fire!