හැඩකාර කොලුකාර | Misconceptions, Status Quo and Sri Lankan Attitude Towards Homosexuality

පහුගිය දවසක එක්සත් ජනපද ශ්‍රේෂ්ඨාධිකරණයෙන් ඉතිහාසගත නියෝගයක් නිකුත් කලා. සමලිංගික යුවලකට කසාද බදින්නත් අයිතියක් ඇති බවත් ඒ කසාදයට විරුද්ධ වෙන්න රජයට අයිතියක් නැති බවත් ඒ නියෝගයෙන් කියවුනා. සමලිංගිකයන්ට විරුද්ධව තිබුන යල්පැන ගිය නෛතික බාධාවන් ඉවත් කිරීම මීට පෙර ලෝකය පුරාත් (පලමුවරට නෙදර්ලන්තය) එක්සත් ජනපදයෙ විවිධ ප්‍රාන්ත පුරාත් (පලමුවරට මැසචුසෙට්ස් ප්‍රාන්තය) සිදු වෙලා තිබුනත් ලෝකයේ බලවත්ම රාජ්‍යයක ශ්‍රේෂඨාධිකරණයකින් එවැනි නියෝගයක් නිකුත් වීම LGBT ප්‍රජාවට ලැබුන විශාල ජයග්‍රහණයක්.

මිත්‍යා එලිදරව්ව

මනුස්සයෙක් තමන්ගෙ පෞද්ගලික සීමාව තුල තවත් මනුස්සයෙකුගෙ අයිතීන් උල්ලංඝනය නොකර කරන ඕනෙම ක්‍රියාවකට විරුද්ධ වෙන්න කිසිම කෙනෙකුට අයිතියක්  නැති වෙන්න ඕනෙ, රජයට වුනත්. ඒක සමකාලින අදහස් වලට හරියටම ගැලපෙන අදහසක්. ඒ අනුව ගත්තාම තම කැමැත්තෙන් එකතු වෙන මිනිස්සු දෙන්නෙක්ට ඒ කරුණ නිසා වෙනස් විදියට සැලකීම අසාමාන්‍යයි. එහෙම වෙලා තියෙද්දි ඒ අයිතිය ගැන කතා කරන්න අමුතුවෙන් ශ්‍රේෂ්ඨාධිකරණ නියෝග නිකුත් කරන්න වෙලා තියෙන්නෙත්, ලෝකය පුරා සමලිංගිකයින්ට විරුද්ධව නෛතික හා සමාජයීය විරෝධය තදින්ම එල්ලවෙන්නෙත්, සමහර රටවල සමලිංගිකත්වය මරණ දඩුවම ලැබෙන වරදක් වෙන්නෙත් ඇයි කියන එක ගැඹුරට හදාරන්න ඕන ප්‍රශ්නයක්. ඒත් මුලින්ම සමලිංගිකත්වය සම්බන්ධයෙන් සමාජගත වෙලා තියෙන මිත්‍යාවන් කිහිපයක පැටළුම් දිග හරින්න වෙනවා.

සමලිංගිකත්වය “අස්වාභාවිකයි” / පරිණාමවාදයට විරුද්ධයි / මනුෂ්‍ය වර්ගයාගේ පැවැත්මට අහිතකරයි

බොහොමයක් වෙලාවට මෙහෙම කියන්නෙ පරිණාමවාදය සහ ස්වාභාවික වරණය ගැනවත් වර්තමාන සමාජයීය, විද්‍යාත්මක, හා තාක්ෂණික සන්දර්භය තුල ස්වාභාවික වරණයෙ භූමිකාව ගැනවත් හරි හමන් අවබෝධයක් නැති පුද්ගලයො. මෙතනදි තේරුම් ගන්න අවශ්‍ය කරුණු කිහිපයක් තියෙනව.

සමලිංගික හැසිරීම් තියෙන්නෙ හෝමෝ සේපියන්ස් සත්ව විශේෂයෙ විතරක් නෙමෙයි කියන කරුණ හොයාගෙන දැන් සැලකිය යුතු කාලයක් ගත වෙලා තියෙනව. පසුගිය දශකය වෙද්දි සමලිංගික හැසිරීම් පෙන්නුම් කරන සත්ව විශේෂ 500කට ආසන්න ප්‍රමාණයක් සොයාගෙන තියෙනවා. මේ අතරිනුත් සමහර දියුණු සත්ව වර්ග සංකීර්ණ සමාජ හැසිරීම් සහ සමහර වෙලාවට එකම සහකරු/සහකාරයා සමග ජීවිත කාලයම ගත කරනව. මේ සත්ව වර්ග සියල්ලන්ගේම සමලිංගික හැසිරීම් එකම ආකාරයේ පරිණාමීය සන්දර්භ වලින් පැහැදිලි කරන්න බැරි වුනත් බොහෝ සත්ව වර්ගයන්ගේ ප්‍රජනන සම්භාවිතාවය වැඩි කරන්න සමලිංගික හැසිරීම් ප්‍රයෝජනවත් වෙන බව සොයාගෙන තිබෙනව.

හොමෝ සේපියන්ස් සන්දර්භයේදී සමලිංගික හැසිරීම් වල පරිණාමීය ප්‍රයෝජනවත් භාවය ගැන පැහැදිලි සොයාගැනීමක් දැනට කරල නැහැ. නමුත් ජනප්‍රිය මතයක් වන්නේ සමරිසිතාවයට සම්බන්ධ ජාන අඩංගු ඇලීලයේ පරිණාමීය වශයෙන් වැදගත් අනෙකුත් ජාන අඩංගු වීම නිසා දීර්ඝ කාලයක් තුල සිදුවන ස්වාභාවික වරණය හරහා සමලිංගික හැසිරීම් නොනැසී පැවතුන බවයි. මෙම රටාව වෙනත් බොහෝ ජාන සම්බන්ධයෙන් ඔප්පු කර ඇති නිසා බැලූබැල්මට පරිණාමීය විරුද්ධාභාසයක් ලෙස පෙනෙන සමලිංගිකත්වය අතිශයින්ම පරිණාමීය වෙන්න පුලුවන් හැකියාව වැඩියි (Phenotype එකක් අනවශ්‍ය හෝ පරිණාමීය වශයෙන් විරුද්ධාභාසයක් විදියට පෙනුන පලියට එයට අදාල Genotype එකත් පරිණාමීය වශයෙන් විරුද්ධාභාසයි කියන්න බැහැ. මෙතනදි ස්වාභාවික වරණයට ලක්වෙන්නෙ ජානයක් මිසක් සත්වයෙක් නෙමෙයි කියන රිචඩ් ඩෝකින්ස්ගේ මතය වැදගත් වෙනවා). අනෙක් අතට සමලිංගික හැසිරීම් කණ්ඩායම් තුල බැදීම් වැඩි කිරීමට ආධාර වූ බවට මතයක් තිබෙනවා.

මේ විදියට බාහිරව පරිණාමීය වැදගත්කමක් නැති නිසා හෝ වර්ගයා බෝ කිරීමක් සිදු නොවන නිසා සමලිංගිකත්වය මනුෂ්‍ය වර්ගයාගේ පැවැත්මට අහිතකරයි කියන තර්කය ඉතාමත් මුග්ධ තර්කයක්. මත්පැන්, දුම්වැටි පානය, අනාරක්ෂිත ලිංගික හැසිරීම්, ගැබ්ගැනීම් වැලැක්වීමේ ක්‍රම වගේ අව බලැති හැසිරීම් පමණක් නොව, යුද්ධ, මිනීමැරීම්, පරිසර විනාශයන් වැනි අධිබලැති හැසිරීම් සියල්ලම සමලිංගිකත්වයට වඩා සිය දහස් ගුණයකින් මනුෂ්‍ය වර්ගයාගේ පැවැත්මට අහිතකර බව ඉතා පැහැදිලියි. අනෙක් අතට තාක්ෂණික දියුණුව හා සෞඛ්‍ය ආරක්ෂිත බව වැඩි දියුණු කිරීම මගින් පරිණාමීය සිමාවන් ඉක්මවා ගිහින් තිබෙන මනුෂ්‍ය සංහතිය තව දුරටත් වර්ගයා බෝකිරීම වැනි හැසිරීම් මත රදා පවතින්නේ නෑ. හෝමෝ සේපියන්ස් වර්ගයා තව දුරටත් විලෝපිකයින්ගෙන් පාලනය වන්නේ නෑ. උත්ප්‍රාසාත්මක ලෙස මනුෂ්‍ය වර්ගයාගේ පරිණාමීය සීමාව වර්ගයා බෝ කිරීම වැඩි වීම නිසා සිදු වෙන්න පුලුවන්. ඒ කෙසේ වෙතත් මෙම තර්කය පදනමක් නැති විහිඵවක් බව පැහැදිලියි.

සමලිංගිකයන් යනු ලමා අපචාරකයින්ය

වරින් වර පල කරන ලද පර්යේෂණ වාර්තා විසින් මෙය මිත්‍යාවක් බවත් සමලිංගික නැඹුරුව සහ ලමා අපචාරක හැසිරිම්/කුමාර කාමක හැසිරීම් (කුමාර කාමය ලෙසින් හැදින්වෙන නැඹුරුම්තාවයත්/pedophilia ලමා අපචාරයට යොමු වීමත්/child abuse අතර පරතරයක් තිබෙන බව පැහැදිලි කල යුතුයි) අතර ඍජු සම්බන්ධතාවයක් නොමැති බවත් පෙන්නා ඇති නමුත් බොහෝ කාලයක් තිස්සේ මෙම මතය සමාජගත වෙලා තිබෙන නිසා නැවත නැවත මතුවෙනවා දකින්න පුලුවන්. කුමාර කාමක හැසිරීම් සහ ලමා අපචාරක හැසිරීම්, ජාන, පවුල් පසුබිම් සහ වෙනත් බොහෝ සමාජ සාධක ගණනාවක බලපෑම් වල එකතුවක් බව බොහෝ පර්යේෂණ තුලින් ඔප්පු වී තිබෙනවා.

මෙම මතය බොහෝ විට ආගමික අන්තවාදීන් විසින් පතුරවන ලද්දක් වුවත් (වෛරවාදී කණ්ඩායමක් ලෙස ප්‍රසිද්ධ වෙස්බොරෝ බැප්ටිස්ට් පල්ලිය ඇමෙරිකාව තුල මෙම මතය පතුරවන්නන්ගෙන් ප්‍රධාන තැනක් ගන්නවා. God Hates Fags යන සටන් පාඨයට ඔවුන් ජනප්‍රියයි), ආගමික මධ්‍යස්ථාන හා පූජක ප්‍රජාවන් අතර ලමා අපචාර බොහෝ සෙයින් සිදු වෙන බව අනාවරණය වෙන්න පටන්ගත්තේ මෑතක සිට. නමුත් මේ බොහෝ ආගමික සංස්ථානයන් සමලිංගිකයින්ට මරණ දඩුවම ලබා දීමට පවා ඉදිරිපත් වෙනවා. මේ අපචාරකයින් අතරින් අඩක් සැගවුනු සමලිංගිකයන් ලෙස (විශාල පරතරයක් තබා වුවත්) උපකල්පනය කලත් ඉන් ඉතුරු අඩ අයිති වන්නේ කුමන කණ්ඩායමටද යන්න වැදගත් ප්‍රශ්නයක්. මේ අනුව සමලිංගිකයන් හා ලමා අපචාරකයන් යනු එකම කණ්ඩායමක් යැයි පැවසීම අපරාධකරුවන් හා අනවසර සරණාගතයින් යනු එකම කණ්ඩායමක් යැයි පැවසීමට සමාන බව පෙනී යනවා. ඍජු සම්බන්ධතාවයක් ඇතැයි මුලින් සිතුනත් තර්කානුකූල ලෙස සොයා බැලුවොත් මොනයම් හෝ පදනමක් නොමැති මතයක්.

සමලිංගිකත්වය යනු ජීවන රටාවකි/තෝරා ගැනීමකි

සමලිංගිකත්වය යනු උපතින් තීරණය වන්නක් බව නොයෙකුත් විද්‍යාත්මක සාධක ඉදිරිපත් වී ඇතත් මෙයත් සාම්ප්‍රදායික සමාජයන් විසින් අත අරින්න ප්‍රතික්ෂේප කරන මතයක්. මෙම මතයෙන් ප්‍රධාන වශයෙන් කියවෙන්නේ සමලිංගිකත්වය හෝ විෂම ලිංගිකත්වය යනු යමෙකුට තෝරා ගත හැකි ජීවන රටාවක් බවයි. බොහෝ ඒක දේව වාදී ආගම් වල සමලිංගිකත්වය මරණ දඩුවම ලැබිය හැකි හැසිරීමක් ලෙස දක්වා තිබෙන නිසා සමලිංගිකයන් දෙවියන්ට එරෙහි ජීවන රටාවක් තෝරා ගත අය හැටියට හෙළා දැකීමක් මෙම සමාජ තුල දක්නට තිබෙනවා.

සමලිංගිකත්වය ලමුන්ට බලෙන් ආරෝපණය කිරීමට හැකි බවත්, පවතින මාධ්‍ය, සමාජ ජාල තුලින් සමලිංගික කණ්ඩායම් එවැනි දේ සිදු කරන බවත් ඉහත මතයට සමානව ලගින් යන, ඒ මත පදනම් වෙන හිතලුවක්. තෝරා ගත නොහැකි හැසිරීමක් ආරෝපණය කරන්නේ කෙසේද යන්න බොහෝ අය සැලකිල්ලට ගන්නේ නැහැ. ඒ වෙනුවට කුමණ්ත්‍රණ, රහස් සංවිධාන ආදී විකාර සම්බන්ධ කොට ගත් මිත්‍යාවන් පිලිගැනීමට සාම්ප්‍රදායික සමාජ සූදානම්.

HIV/AIDS සමලිංගික රෝගයකි

කලින් සදහන් කල ක්‍රිස්තියානි මූලධර්මවාදී කණ්ඩායමක් වන වෙස්ට්බොරෝ බැප්ටිස්ට් පල්ලිය AIDS යනු සමලිංගිකත්වය වෙනුවෙන් දෙවියන් දුන් දඩුවම යන මතය ප්‍රසිද්ධ කිරීමට මූලික වී කටයුතු කලා. නමුත් මෙම මතයේ සාවද්‍යතාවය තේරුම් ගැනීමට HIV/AIDS වෛරසයේ ඉතිහාසය ගැන සොයා බැලිය යුතුයි.

HIV/AIDS වෛරසයේ ආරම්භය එම වර්ගයේම චිම්පන්සීන් අතර දක්නට ලැබෙන අවුරුදු 32000කට වඩා පැරණි Simian Immunodeficiency Virus ලෙස මේ වන විට සොයාගෙන තිබෙනවා. ඒ අනුව බොහෝ විට මෙය මනුෂ්‍ය ශරීරයට ඇතුලු වී පරිණාමය වී ඇත්තේ චිම්පන්සින් දඩයම් කොට මස් ආහාරයට ගැනීමෙන් විය හැකි බව පිලිගත් මතයයි.

වෛරසය ඇමෙරිකා එක්සත් ජනපදයට ඇතුලු වී ඇත්තේ 70 දශකය තුල විය හැකි යැයි විශ්වාස කල හැකි නමුත් 80 දශකය මුල වන තෙක් කිසියම් ආකාරයක වසංගතයක් ඇතැයි වෛද්‍යවරයන්ගේ සැලකිල්ලට ලක්වන්නේ නැහැ. තරුණ සමලිංගිකයින් කිහිප දෙනෙකු විනාශ වූ ප්‍රතිශක්තීකරණ පද්ධති නිසා සාමාන්‍යයෙන් මහලු පුද්ගලයන්ට වැලදෙන රෝග වැලදී මිය යන අයුරු අධ්‍යයනය කරන විට මෙවැනි වෛරසයක් මිනිසුන් අතර පැතිර යන බවට ඔවුන් සොයා ගන්නවා. නමුත් මුල් අවධියේදී මෙය දරුණු ලෙස පැතිරෙන්නේ පිරිමි සමලිංගික කණ්ඩායම් අතර. මෙයට හේතු කිහිපයක් මුල් වෙනවා.

ඇමෙරිකාව තුල 60 සහ 70 දශකයේ සිදුවන ලිංගික විප්ලවය නමින් හැදින්වෙන සමාජ විපර්යාසය නිසා සමලිංගිකත්වය සහ පොදුවේ අනෙකුත් ලිංගික චර්යා පිලිබද සාපේක්ෂව ලිහිල් මතයක් සමාජ ගත වුනත් ආගමික සහ වෙනත් සාම්ප්‍රදායක කණ්ඩායම් වලින් දිගින් දිගටම සමලිංගිකයන් හට දැඩි විරෝධයක් එල්ල වෙනවා. මේ නිසා හැකි සෑම අයුරකින්ම ලිංගික චර්යාවේ යෙදීම එම සමාජ විරෝධයන්ට එරෙහි සිදු කල හැකි සාර්ථකම කැරැලි ගැසීම බව සමලිංගිකයන් අතර එවකට ජනප්‍රිය වන මතයක්. මේ නිසා බොහෝ විට නාදුනන පුද්ගලයන් සමග ලිංගික චර්යාවන්හි යෙදීම බහුලව සිදු වුනා.

පිරිමි සමලිංගිකත්වය හා සම්බන්ධ චර්යාවන්ගේ ස්වාභාවය නිසා HIV වෛරසයේ ආකාර කිහිපයක ආසාදන සම්භාවිතාව වැඩි විය හැකියි. ගැබ් ගැනීමේ හැකියාවක් නොමැති නිසා කොන්ඩම් ආදී ආරක්ෂක උපක්‍රම භාවිතා නොකිරීම මෙවැනි තත්වයකට එකතු කල විට ආසාදකයින් ගණන දෙගුණ තෙගුණ වීමට වැඩි කාලයක් ගත වන්නේ නැහැ.

මුල් කාලයේ වෛද්‍යවරුන්ගේ මතය වුනේ HIV/AIDS බෝ වන්නේ පිරිමි සමලිංගිකයින් අතර පමණක් කියලයි. ගැහැණුන්ට මෙය බෝ වන්නේ නැති බව ඔවුන් තදින්ම විශ්වාස කලා. නමුත් ක්‍රමක්‍රමයෙන් ලිංග භේදයකින් හෝ ලිංගික නැඹුරුවේ භේදයකින් තොරව වෛරස ආසාදන තත්ව වැඩි වන විට ඔවුන්ට ආසාදනයේ නම GRID (Gay-related immune deficiency) සිට AIDS දක්වා වෙනස් කරන්න සිදු වුනා. අද වන විට AIDS ආසාදනය පැතිරීම සහ සමලිංගිකයින් අතර කිසිම ආකාරයේ සම්බන්ධතාවයක් නැති බවට ඔප්පු වී අවසානයි.

ආගමික බලපෑම

දියුණු යැයි සැලකිය හැකි රටවල ක්‍රම ක්‍රමයෙන් මෙවැනි මිත්‍යාවන් පසු බැස යන නමුත් ලෝකය පුරා පොදුවේ සමලිංගිකත්වයට එරෙහි මතවාදයන් තවමත් ශක්තිමත්ව පවතිනවා. මෙම විරෝධයේ ප්‍රධාන මූලය පිහිටලා තියෙන්නෙ ලෝකය පුරා බලවත් ලෙස පැතිරිලා තිබෙන ඒබ්‍රහමික ආගම් මූලධර්ම නිසා.

දෙවියන් වහන්සේ විසින් ඒබ්‍රහම් වෙත පොරොන්දු වූ දායාදයන් පිලිබද වෘතාන්තය මත පදනම් වෙන ආගම් ඒබ්‍රහමික ආගම් ලෙස හැදින්වෙනවා. ප්‍රධාන වශයෙන් මෙම කාණ්ඩයට යුදෙව්, ක්‍රිස්තියානි සහ ඉස්ලාම් ආගම් අයත් වෙනව. මේ ආගම් තුන සරලව දෙවියන් වහන්සේගේ පණිවිඩයේ පිලිවෙලින් නවතම අනුවාද ලෙස සලකන්න පුලුවන්. ඒ අනුව ක්‍රිස්තියානුවන් මෝසෙස්වත්, මුස්ලිම් භක්තිකයන් ජේසුන්වත් පිලිගත් දේව වාක්‍ය පණිවිඩකරුවෙකු ලෙස පිලිගන්නා නමුත් එම පණිවිඩයේ නවතම ලියැවිල්ල තිබෙන්නේ තමන් අත යැයි සියල්ලෝම (ශතවර්ශ ගණනාවක් තිස්සේ මිනීමරා ගන්නා තත්වයක් වන තෙක්) ආරවුල් කරමින් තර්ක කරනවා.

මේ සමාන ලක්ෂණ නිසා සමාජ සාර්ධර්මයන් පිලිබද බොහෝ සංකල්ප මේ ආගම් තුනේම නොවෙනස්ව පවතිනවා. සමලිංගිකත්වය පිලිබද සන්දර්භයේදී දේව වාක්‍ය හැසිරෙන්නේ යක්ෂ වාක්‍යයක් ලෙසින්. යුදෙව්වන් සහ ක්‍රිස්තියානි භක්තිකයන් මෙවැනි අවස්ථාවල බොහෝ ලෙස හුවා දක්වන බයිබල පරිච්ඡේද තුල “මිනිසෙක් තවත් මිනිසෙක් සමග ගැහැණියක් හා හැසිරෙන්නා සේ හැසිරෙන්නේද එය පිලිකුල් සහගත ක්‍රියාවක් බවත් ඒ සදහා දඩුවම මරණය බවත්” ඉතා පැහැදිලිව දක්වා තිබෙනවා. කුරාණයේ සමලිංගිකත්වයට එරෙහිව පැහැදිලිව සදහන් කර ඇති පරිච්ඡෙද අදටත් ෂරියා නීතිය ක්‍රියාත්මක වන රටවල සමලිංගිකයන් සදහා මරණ දඩුවම ක්‍රියාත්මක කිරීමට හේතු වී තිබෙනවා. උගන්ඩාවේ මෑත කාලීනව ක්‍රියාත්මක වුන සමලිංගික විරෝධී නීති මාර්ග වලට ආසන්නතම හේතුව ලෙස සොයාගෙන ඇත්තේ ඇමෙරිකානු ක්‍රිස්තියානි ධර්ම ප්‍රචාරකයින්ගේ බලපෑම්.

මේ අනුව මේ සමාජ විරෝධී ආකල්ප වල මූලික පදනම ප්‍රධාන වශයෙන් ගැබ් වෙලා තියෙන්නේ ඒක දේවවාදී ආගම් කිහිපයක බව පැහැදිලියි. මෙලෙස ලිංගික ක්‍රියාවලියක් සීමා කිරීමේ මූලික හේතුව ඒබ්‍රහමික ආගම් වලට කලින් පැවතුන පේගන් ආගම් යටපත් කිරීමේ උත්සහයක් බව මතයක් පවතිනවා. බොහෝ පේගන් ඇදැහිලි මිනිස් ලිංගික චර්යාවන් උත්කර්ශයට ලක් කලා. ඔවුන්ගේ පූජකයින් සහ පූජකවරියන් සමග ලිංගිකව හැසිරීම එක්තරා ආකාරයක දේව වන්දනාවක් වී තිබුනා. එවැනි ක්‍රියා යටපත් කොට නව නීති පද්ධතියක් ගෙන ඒමට උත්සහ කිරීම තුලින් සමලිංගිකත්වයට එරෙහි මතවාදයන් කරලියට පැමිණි බව කලින් සදහන් කල මතයෙන් පැවසෙනවා.

ඒබ්‍රහමික ආගම් තුල සමලිංගිකත්වයට එරෙහිව මෙවැනි ඍජු උපදෙස් අඩංගු වීම සම්බන්ධව පවතින තවත් මතයක් වන්නේ “ඵලදායී වී තම වර්ගයා බෝ කරන්න” යන දේව විධානයට සමලිංගිකත්වය විරුද්ධ වන නිසා බවයි. උපත් පාලන ක්‍රම වලට හා ගබ්සාවට කතෝලික පල්ලිය විරුද්ධ වීමේ ප්‍රධාන හේතුවත් මෙම විධානයට සම්බන්ධ සංකල්පයයි. ගෝත්‍රයක් වශයෙන් තමන්ගේ ඔලුගෙඩි ගණන වර්ධනය නොවන ක්‍රියාවන් අඩපණ කිරීම මෙහි මූලාරම්භය වෙන්න පුලුවන්.

අද වන විට බොහෝ යුදෙව් නිකායන් විසින් සමලිංගිකත්වය පිලි අරගෙන තිබුනත් තවමත් සමලිංගිකත්වයට තදින් විරෝධය පාන ක්‍රිස්තියානි නිකායන් බහුතරයක් තිබෙනවා. බොහොම සුලු නිකායන් ප්‍රමාණයක් සමලිංගිකත්වය පිලිගන්න නමුත් එවැනි නිකායන් බයිබලයේ ඍජු පරිවර්තනයෙන් එහාට ගිය නිකායන්. ඉස්ලාමය තවමත් වෙනස් වීමට අකමැති නිසා ගෝත්‍රික සාරධර්ම වෙනස් වී නැහැ. ඒ නිසා සියලු ප්‍රධාන ඉස්ලාම් නිකායන් තවමත් සමලිංගිකයන්ට මරණ දඩුවම පැනවීමට අනුබල දෙනවා.

මේ අනුව යුදෙව්, ක්‍රිස්තියානි, හෝ ඉස්ලාමය පැතිර ඇති රටවල මෙවැනි සමාජ විරෝධී ආකල්ප මුල් බැසගෙන තිබීම පැහැදිලි කරගන්න පුලුවන්. නමුත් වඩාත් සාමකාමී සහ ආධ්‍යාත්මිකත්වයට නැඹුරු බුද්ධාගම වැනි පෙරදිග ආගම් පැතිර ඇති රටවලත් පොදුවේ සමලිංගිකයන්ට එරෙහිව මතවාද මුල් බැසගෙන තිබීම මෙලෙස ඍජු ලෙස පැහැදිලි කරගන්න බැහැ.

අපරදිග ඒබ්‍රහමික ආගම් ඉහත සදහන් කල හේතු නිසා සමලිංගිකත්වයට එරෙහි වුනත් පෙරදිග ආගම් වල බොහෝ විට එවැනි පැහැදිලි විරෝධතාවයන් හොයාගන්න බැහැ. බුද්ධාගම, තාඔවාදය, හින්දු දහම, හෝ කොන්ෆියුසිස්වාදය වැනි දර්ශනවාදයන් පදනම් කරගත් ආගම් වල බොහෝ විට මනුෂ්‍යාගේ ලිංගික නැඹුරුව වැනි සුලු කරුණු ගැන අවධානය යොමු කරනවා අඩුයි. ඒ වෙනුවට ඒවා පොදුවේ හැගීම් පාලනය ගැන කතා කරන්න යොමු වෙනවා.

ථෙරවාද බුද්ධාගමේ මහණුන්ට කිසිම ආකාරයේ ලිංගික හැසිරීමක යෙදීම තහනම් කර තිබෙනවා. එවැනි නීතියක් කඩ කලහොත් දඩුවම ශාසනයෙන් නෙරැපීම. මෙය විශේෂයෙන් සමලිංගිකත්වයට අවධානයක් යොමු කිරීමක් නොවේ. ගැහැණුන් හා පිරිමින් වෙන වෙනම ගොඩනැගිලි වලට ගාල් කොට ලිංගික හැසිරීම් අවම කොට තිබෙන වටපිටාවක පාලනයකින් තොරව ලිංගික හැසිරීම් වැඩි වෙන්න පුලුවන් කියන දේ සමහර විට බුදුන්ට හෝ ත්‍රිපිටකය ග්‍රන්ථාරූඩ කල පූජකයින්ට සිතෙන්නට ඇති. දඩුවම ශාසනයෙන් නෙරැපීම යන්න අපරදිග ආගම් වල ඊට කිසිසේත්ම සමාන නොවන මරණ දඩුවමට සන්සන්දනය කරන්නවත් බැහැ. නමුත් නැවත නැවතත් කිව යුතු දෙයක් වෙන්නේ සමලිංගික හෝ විෂමලිංගික වශයෙන් ලිංගික නැඹුරුතාවය මත පාපයේ මට්ටම වෙනස් නොවන බව බුද්ධ වචනය හැදෑරීමෙන් සිතා ගන්න පුලුවන් යන්නයි. “කාමයේ නොවරදවා හැසිරෙන්නේනම්” හා අනෙකුත් ආකාරයෙන් පස් පව් නොකඩන්නේ නම් ඔබ ගිහියෙකු ලෙස කා සමග හෝ කෙසේ ජීවිතය ගත කලත් වෙනසක් නැහැ.

හින්දු ආගම ඇත්තෙන්ම ආගම් කිහිපයක එකතුවක්. ඒ නිසා එහි නොයෙකුත් දේ ගැන විවිධාකාරයේ මතවාද පුලුල් පරාසයක පැතිරිලා තිබෙනවා දකින්න පුලුවන්. සමලිංගිකත්වය ගැන බුද්ධාගමේ වගේ උදාසීන මතයක ඉදන් යම් තරමකට ඒ සදහා විරෝධාකල්පයක් දක්වන මට්ටමක් දක්වන තරමට පරාසයක් හින්දු ආගමේ තිබෙනවා. අතීත ඉන්දියාවේ ලිංගිකත්වය පිලිබද විවෘත ආකල්පයක් තිබන බව අපිට දකින්න පුලුවන්. කාම සූත්‍ර වැනි ලිංගික චර්යාවේ ඉතා ප්‍රසිද්ධ සාහිත්‍ය පවා බිහි වෙන්නෙ එවැනි පසුබිමක. ඒ නිසා බොහෝ වෙලාවට විවිධාකාර ලිංගික ආශාවන් ඇති මිනිසුන් සිටිය හැකි බවත් ඒ ආශාවන් ඔවුන්ගේ පෞද්ගලිකත්වයට අදාල දේවල් බවත් බොහෝ හින්දු කණ්ඩායම් වලින් පිලිගන්නවා.

ලංකාවේ තත්වය

මේ අනුව බලද්දි පෙරදිග රටවල සමලිංගිකත්වය පිලිබද සාපේක්ෂව ලිහිල් ආකල්පයක් පවතින්න ඕනෙ. නමුත්  යථාර්තය මීට වැඩිය වෙනස්. විශේෂයෙන් ලංකාවේ තාමත් සමලිංගිකත්වය පිලිබද තියෙන්නෙ මැද පෙරදිග අදහස්. සමලිංගිකයෙකුට “පොන්නයා” යනුවෙන් ඇමතීම වීරකමක් විදියටත් දේශපාලනිකව වලංගු තර්කයක් ලෙසත් තාම සමාජය පිලිගන්න බවක් පේනවා. බොහෝ කාලයක් විපක්ෂ නායකයෙකුව සිටි රනිල් වික්‍රමසිංහ අගමැතිවරයා මෙම දේශපාලනික බහුබූතයේ ප්‍රධාන වින්දිතයෙක්. රනිල් වික්‍රමසිංහ අගමැති වීමම ලංකාවේ එවැනි තත්වයක් නැති බවට සාක්ෂියක් නොවේදැයි තර්ක කල හැකි නමුත් රනිල් වික්‍රමසිංහ අගමැති වන්නේ රනිල් වික්‍රමසිංහ වීම නිසාම නොවන බවත් අදටත් ඔහු ප්‍රසිද්ධියේ තමන් සමලිංගිකයෙකුයැයි පැවසුවහොත් (ඔහු ඇත්තටම සමලිංගිකයෙකුනම්) තත්වය කෙසේ වෙයිදැයි සිතා ගත නොහැකි වීමත් නිසා එම තර්කය අහෝසි වෙනවා.

සංගක්කාරගේ හාදුවෙන් විනාශ වුනු හෙල සංස්කෘතිය

ෆේස්බුක් ලංකාවේ බුද්ධිය පිලිබද හොදම උදාහරණය නොවුනත් මෙවැනි අදහස් දරණ මිනිසුත් සිටිනවා කියන එක මතක් කරගන්න හොදම තැනක්. ආඩම්බරෙන් බෞද්ධයෙක් කියන්නේ ක්‍රිස්තියානි සාරධර්ම පිලිපදින ගමන්. ඒ නිසාමද මන්ද ලංකාවට කවුරුවත් වදින්න කලින් ලංකාවෙ තාමත් මිනිස්සුන්ට නීතිය ඉදිරියෙ සමානාත්මතාවයක් නැහැ කියල මුලු ලෝකෙම ඉදිරියෙ හෙලුවැල්ලෙන් පේනවා කියන එක දන්නෙ නැහැ.

පෙරදිග බොහෝ රටවල නීති සම්පාදනයට සහ නූතන සමාජ සාර්ධර්ම ගොඩ නැගීමට එවැනි ආවේණික ආගම් සහ සංස්කෘතික ලක්ෂණ වලට වඩා යටත් විජිත වාදී ආක්‍රමණික බටහිර සංස්කෘතික ලක්ෂණ සහ ආගම් යොදා ගෙන තිබෙනවා. මේ නිසා පුද්ගලයාගේ ලිංගිකත්වය වැනි සුලු හැසිරීම් වලට එරෙහිව නීති සම්පාදනය වී තිබීම සහ එම නීති වෙනස් කිරීම අපහසු වී තිබීම නිසා අදටත් සමලිංගිකයන් හට නිදහසේ ජීවත් වීමට වෙනම අරගල කිරීමට සිදු වෙලා තිබෙනවා. ලංකාවේ තත්වය පැහැදිලි කරගන්න පුලුවන් මෙන්න මේ විදියටයි.

ලංකාවේ LGBT අයිතිවාසිකම් පිලිබදව ප්‍රධාන වශයෙන් පැති දෙකක් සලකා බලන්න වෙනවා. සමාජය තුල LGBT අයිතිවාසිකම් පිලිබදව මුල් බැසගෙන තියෙන මතවාදය ගැන ඉහත පැහැදිලි කලා. නමුත් ප්‍රශ්නය ඒක විතරක් නම් ක්‍රමානුකූල දැනුවත් කිරීමක් විතරක් අවශ්‍ය වෙන්න තිබුනා.

ලංකාවේ නීති පද්ධතියෙනුත් මනුෂ්‍යයෙකුගේ ලිංගික නැඹුරුතාවය මත දඩුවම් පනවානම් වඩා ක්‍රියාකාරී පියවරක් ගන්න වෙන බව පැහැදිලියි. ව්‍යවස්ථාවට අනුව (12 වගන්තිය) සෑම මනුෂ්‍යයෙකුම සමාන බව පහත ආකාරයට සදහන් වෙනවා.

No citizen shall be discriminated against on the grounds of race, religion, language, caste, sex, political opinion, place of birth or any one of such grounds

නමුත් දණ්ඩ නීති සංග්‍රහයේ 365 සහ 365A වගන්ති අනුව “ස්වාභාවික” නොවන ලිංගික ක්‍රියාවක යෙදෙන අයෙකුට දඩුවම් ලෙස අවුරුදු දහයක උපරිම සිර කාලයක් හා දඩයක් පැනවිය හැකියි.

365. Whoever voluntarily has carnal intercourse against the order of nature with any man, woman, or animal, shall be punished with imprisonment of either description for a term which may extend to ten years, and shall also be liable to fine.

365A. Any male person who, in public or private, commits, or is a party to the commission of, or procures or attempts to procure the commission by any male person of, any act of gross indecency with another male person, shall be guilty of an offence, and shall be punished with imprisonment of either description for a term which may extend to two years or with fine, or with both, and shall also be liable to be punished with whipping.

සාමාන්‍යයෙන් මෙවැනි වගන්ති මහජන විනය රැකීම වැනි දියාරු තර්ක වලින් ආරක්ෂා කරන්න හැදුවත් සාමාන්‍ය සමාජ සාරධර්ම සමග සන්සන්දනය කල විට මෙය බරපතල ලෙස මිනිස් අයිතිවාසිකම් උල්ලංඝනය කිරීමක් බව පැහැදිලියි. වැඩිහිටි මිනිසුන් වෙනත් අයගේ අයිතිවාසිකම් කඩ නොවන පරිද්දෙන් හෝ සමාජයට හානියක් නොවන පරිද්දෙන් තමන්ගේ කැමැත්තෙන් කරන්නේ කුමක්ද යැයි සොයා බලා ඒ ක්‍රියාවලට දඩුවම් පැනවීමට රජයකට අයිතියක් තිබිය යුතු නැහැ. එකිනෙකාට ආදරය කරන (හෝ නොකරන) දෙදෙනෙකුගේ ලිංගික එක් වීමකින් රාජ්‍ය ආරක්ෂාවට හානි වෙනවානම් දඩුවම් කල යුත්තේ එලෙස දුර්වල ආරක්ෂාවක් සලසන රජයකටයි.

එක් අතකින් මෙවැනි වගන්ති දණ්ඩ නීති සංග්‍රහයට පැමිණෙන්නේ සහ ඒවා රැදී පවතින්නේ ලංකාවේ යම් තරමකට අදෘශ්‍යමානව පවතින බලපෑමක් වන කතෝලික පල්ලිය නිසා යම් වගකීමකින් පවසන්න පුලුවන්. දශකයකට පමණ පෙර DaVinci Code චිත්‍රපටියේ ලංකාවේ දර්ශනය කරනවාට විරුද්ධව පැවතුන එක් දුර්වල විරෝධතාවයක් නිසා එම චිත්‍රපටිය ලංකාවේ තහනම් වුනා. මේ සාමාන්‍යයෙන් ලංකාවේ විරෝධතාවයක් පැවැත්වූ විට ලැබෙන ප්‍රථිපලය නොවන බව අන්තරේ ශිෂ්‍යයන් ඔබට පවසාවි. කතෝලික පල්ලියේ බලපෑම අදෘෂ්‍යමාන වන්නේ ඒ නිසා. අදටත් කොන්ඩම් ආදී උපත් පාලන ක්‍රම භාවිතයට කතෝලික පල්ලියේ විරුද්ධ වීම් රජයන් දෙදුරුම් කන තත්වයට බලපානවා. යටත් විජිත නීති පද්ධතියේ නටඹුන් වෙන ඉහත වගන්ති නවීන සමාජයට ගැලපෙන විදියට වෙනස් නොවෙන්නෙ ඒ බලපෑමට විරුද්ධ වෙන්න කවුරුවත් කැමති නැති නිසා වෙන්න පුලුවන්.

රටක් වශයෙන් මෙවැනි ගල් යුගයේ මතවාද වලින් අප එලියට පැමිණිය යුතු කාලය පසු වෙලාත් ගිහින්. ඉහත සදහන් වගන්ති ව්‍යවස්ථාවට පටහැනි බව ඔප්පු කොට ඒවා වෙනස් කිරීමට තවමත් කිසිම දේශපාලකයෙක් උත්සහයක් අරගෙන නැහැ. එවැනි කාර්යයක් මූලිකත්වය ගන්නා අයෙකුට ඉහත සදහන් කල සමාජ මතවාදය වෙනස් කිරීමේත්, කතෝලික පල්ලිය, මුස්ලිම් ප්‍රජාව හා බුද්ධාගම නොදන්නා බෞද්ධයින් ආදී බලපෑම් යටපත් කිරීමේත් බැරෑරුම් කාර්යභාරය පැවරෙනවා. ලංකාවේ දේශපාලකයෙකු ලෙස එවැනි ජනහිතකාමී වැඩකට අවදානමක් ගැනීමට කවුරුවත් කැමති වෙන්නේ නැහැ (කැලෑ කැපීමක්, කොමිස් ගැහිල්ලක් හැර). නමුත් සමාජයක් ලෙස ඉදිරියට යෑමට අවශ්‍ය වන්නේත් එවැනි දේශපාලකයින්.

පුද්ගල නිදහස ඉහලින් තබා සලකන, පුද්ගල නිදහසට ව්‍යවස්ථාව හා නීති පද්ධතිය තුලින් ආරක්ෂාව සලසන රටවල් අනෙක් රටවලට සාපේක්ෂව සියලු පැති වලින් දියුණුව ලබන බව ලොව පුරා නොයෙකුත් නිදසුන් වලින් දකින්න පුලුවන්. ඒ තමන් කුමන අවස්ථාවේ පහර කෑමකට, ඇනුම් පදයකට හෝ අත්අඩංගුවට පත් වී සිරගත වේ දැයි අනවශ්‍ය බියකින් තොරව පුද්ගල දියුණුව වෙනුවෙන් වැඩ කිරීමට යාන්ත්‍රණයක් ක්‍රියාත්මක වීම නිසයි. පුද්ගලයෙකුට ආත්ම ගරුත්වයකින් යුතුව තම කටයුතු කර ගෙන යෑමේ ඉඩ සැලසීම තුලින් ඵලදායි පුද්ගලෙයක් ආර්ථික වර්ධනයට එකතු වීමත්, එකිනෙකාට ගරු කිරීම තුලින් සමාජ සාරධර්ම වර්ධනයත්, ආරක්ෂිත වටපිටාවක් සැලසීමෙන් පුද්ගලයා කරදරයකට පත් නොවී සිටීමට උත්සහ ගන්නා තත්වයක සිට තමාගේ උපරිම සඵලතාවය ලගා කර ගැනීමට උත්සහා ගන්නා තත්වයකට ලගා වීමත් මේ දියුණුවට හේතු වෙනවා.

යම් අයෙකු ආගමානුකූලව සමලිංගිකත්වය පාපයක් ලෙස සිතනවානම් ඔහු හෝ ඇය ඒ අනුව ජීවත් වීමේ කිසිම වැරැද්දක් නැහැ. නමුත් ආගමක් පදනම් කරගෙන මිනිසුන්ගේ පෞද්ගලිකත්වය පාලනය කිරීමට නීතිමය රාමු ක්‍රියාත්මක කිරීම අනුමත කරන්න බැහැ.

ලංකාවේ සමලිංගික ප්‍රජාවක් ක්‍රියාකාරීව මෙම අරමුණු ඉටු කර ගැනීමට උත්සහා ගන්නා අයුරු පේන්න නැහැ. ඉහල පන්ති වල ප්‍රජාවන් තුල ප්‍රගතිශිලී යැයි සැලකිය හැකි ආකල්ප පෙනෙන්න තිබුනත් ඒවා සමාජ කතිකාවතක් දක්වා වර්ධනය කිරීමට ඔවුන් උත්සහා ගන්නා බවක් පෙනෙන්නට නැහැ. Colombo Pride වැන්නක් සංවිධානය කිරීමට පෙර නීතිමය බාධාවන් ඉවත් කර ගැනීමට උත්සහයක් ගත යුතුයි. දේශපාලනිකව කතිකාවතක් ගොඩ නැගියි යුතුයි. ප්‍රජාවකින් 1%-3%ක් අතර පූර්ණ සමලිංගිකයින් වන තත්වයක (සමලිංගිකත්වය හා විෂම ලිංගිකත්වය On/Off අාකාරයේ තත්වයන් නොව ලිංගික නැඹුරුව පුලුල් ආකාරයේ පරාසයක් බව මතයක් ඉදිරිපත් කලේ 50 දශකයේදී ඇල්ෆ්‍රඩ් කින්සිගේ කින්සි වාර්ථා තුලින්) සමලිංගිකයින් සිටින්නේ ප්‍රභූ පාන්තික ප්‍රජාවන් තුල විතරක් වීම විය නොහැකියි.

අවශ්‍ය ප්‍රමාණයට වඩා දීර්ඝ වුනු මෙම ලිපියේ අරමුණ වුනේ සමලිංගිකත්වය පිලිබද පසුබිම හා එහි ලංකාවේ සන්දර්භය ගැන වැදගත් යැයි සැලකෙන කරුණු කිහිපයක් සාකච්ඡා කිරීම. එයත් විෂම ලිංගිකයෙකුටම කරන්නට සිදුවීම එක්තරා ආකාරයකට මෙම ලියුමේ අවශ්‍යතාවය ඔප්පු කරනවා.

ප.ලි: Accept ෆේස්බුක් පිටුව