නගුට විසින් බල්ලා වැනීම හෙවත් අපේ කාලයේ අන්දරේලාගේ කතාව

tail

අප අසා ඇති ආකාරයට තුන් වසරක් ශිල්ප කල සරසවි සිසුන් යනු යම් මට්ටමක බුද්ධියකින් හෙබි අය වේ. නමුත් දිනෙන් දින දකින සිදුවීම් අනෙකක් කියා පාන අයුරු අපට බලා සිටීමට සිදුව ඇත්තේ හද පිරි ශෝකයෙනි.

අප පසුගිය දවසක සිංහල යුනිකේත බ්ලොග්කරුවන්ගේ සංගමයේ ගූගල් සමූහය තුල ආරම්භ කරන ලද කතා බහකට ලැබුණු පිළිතුරු මෙම තත්වය වඩා හොඳින් විද්‍යාමාන කලේය. අප එම සාකච්ඡාව ආරම්භ කලේ සිංහල යුනිකේත බ්ලොග්කරුවන්ගේ සංගමය තුල වඩාත් පුළුල් වූ දර්ශනයක් දැක ගැනීමටයි. එය සිංහල යුනිකේත බ්ලොග් සංගමය, සිංහල බ්ලොග් සංගමය දක්වා වර්ධනය කිරීම අරමුණු කොට ගත්තකි. නිර්මාණත් යුනිකේතත් අතර වෙනස වටහා ගෙන අන්තර්ජාලයේ සිංහල නම් යුනිකේත යැයි සිතා සිටි මානසිකත්වය වෙනස් කිරීමට ගත් උත්සහයකි. අවාසනාවට එය බොහෝ අය යුනිකේත සම්මතයට විරුද්ධ වීමක් ලෙසත්, ඇතැමුන් සිංහල යුනිකේත බ්ලොග්කරුවන්ගේ සංගමය ඇද වැට්ටීමට (ROTF!!!) ගත් උත්සහයක් ලෙසත් තම තමන්ගේ ලාබාල අර්ථ කථනයන්ට රාමු කර ගත් අතර එහි ප්‍රථිපලයක් ලෙස දැන් අප ඉතාමත් අකමැති ආකාරයට සිංහල යුනිකේත බ්ලොග් සංගමය ලෙසත් නිදහස් සිංහල බ්ලොග් සංගමය ලෙසත් ඒකරාශී වීම් දෙකක් දක්නට ලැබේ.

කරුණ එසේ වුවද අප වඩාත් පුදුමයට පත් කල කාරණාවක් වූයේ මේ සම්බන්ධයෙන් තම තම නැණ පමණින් බ්ලොග් සටහන් කර තිබූ ආකාරයයි. නැට්ට තදින් පාගාගෙන උතුර දකුණ නිලංකාර කරගෙන ඔහේ කියවන්නන් හා අබමල් රේණුවකවත් සාමාන්‍ය දැනීමක් නොමැති සයිබර් වීරයන් විකාර රූපී ලෙස ඉදිරිපත් කර තිබූ කරුණු සම්බන්ධයෙන් අප නොයෙක් වතාවන්හිදී අපගේ මතය ප්‍රකාශ කර ඇත. ඇත්තේ ඒවා ග්‍රහණය කර ගැනීමේ අපහසුවකි.

මෙම තත්වය මොවුන්ගේ අඳබාලත්වය වඩාත් හොඳින්ම ප්‍රදර්ශනය කරවන්නේ, යුනිකේත බ්ලොග්කරණය සඳහා ඌනපූරණයක් ලෙස කල යෝජනාව යුනිකේත ප්‍රතිස්ථාපනය කිරීමක් ලෙස වරදවා වටහා ගැනීමයි. නිර්මාණකරුවෙකුගේ නිර්මාණ ප්‍රේක්ෂකයින් අතරට ගෙන යෑමට යුනිකේත ඇඟේ ගසා දැමීම අපට නම් ප්‍රහේලිකාවකි. අප දන්නා තරමින් යුනිකේත යනු මෙවලමකි. එය යොදාගෙන අන්තර්ජාලය තුල සිංහල අන්තර්ගතයන් එකතු කල හැක. නමුත් ඉහත වාක්‍යය අනෙක් පැත්තට යොදා ගත නොහැක. අන්තර්ජාලයේ සිංහල අන්තර්ගතය යනු සිංහල යුනිකේතම නොවේ. යුනිකේත දැනට පවතිනා එකම මෙවලම ද නොවේ.

මෙහිදී වැඩි දෙනා ඉදිරිපත් කරන මතයක් වනුයේ සෙවුම් යන්ත්‍ර දත්ත ගබඩා සඳහා එකතු වීමට නම් සිංහල යුනිකේත අවශ්‍ය බවත් එම නිසා සිංහල සියළු දේ යුනිකේත විය යුතු බවත්ය. අප මෙහි පලමු කොටස හා එකඟ වෙමු. එය තාක්ෂණික කරුණකි. නමුත් දෙවෙනි කොටස අපට මහා අපභ්‍රංසයකි. අන්තර්ජාලයේ අන්තර්ගතයන් ඇත්තේ සෙවුම් යන්ත්‍ර වල දත්ත ගබඩා හී තැන්පත් වීම සඳහා නොව පාඨකයින්ට කියවීම සඳහාය. සෙවුම් යන්ත්‍ර යනු ද්වීතීයික වැදගත් කමකින්  යුතු කරුණකි. එම නිසා සිංහල නම් යුනිකේත යන පඬි වඳනේ කිසිදු අර්ථයක් නොමැත.

සම්මතයන් තිබිය යුතුය. විවිධ වූ තාක්ෂණික පසුබිම් මත පොදු සන්නිවේදනය මාධ්‍යයක් තනා ගැනීමට එය උදව් වේ. අවශ්‍යතාව එයයි. සන්නිවේදනයයි. සම්මතය ඒ සඳහා විසඳුමක් පමණි. යුනිකේත සම්මතයක් බව සැබෑය. නමුත් පින්තූරයක් මත ලියූ කවියක් සිංහල කියවීමට හැකි අයෙකුට කියවා ගත නොහැකි වීමට හේතුවක් නොමැත. එම නිසා සන්නිවේදනයට ඇති එකම මාධ්‍ය සම්මතය නොවේ.

stupidමෙවැනි අදහසක් පසුබිම් කර ගත් අපගේ සංවාදය යුනිකේත වෙනුවට ඇස්කි (ASCII) යෝජනා කිරීමක් ලෙස අවබෝධ කරගත්වුන්ට අපි අපගේ කණගාටුව ප්‍රකාශ කරමු. ඔබ තව දුරටත් ඉගෙන ගත යුතුය. නලින් ද සිල්වලා චතුස්කොටික පිළිබඳ කතා කරන අවධියේ ඔබ 1 හා 0 නැමැති තත්වයන් තුල දෝලනය වීම නතර කල යුතුය.

මෙය සාමාන්‍යයෙන් මෙවැනි කණ්ඩායම් තුල පැහැදිලිව දක්නට ඇති තත්වයකි. තාක්ෂණයත් එහි පරිශීලකයිනුත් යන කොන් දෙක ඉතා භයානක ලෙස මොවුන් පටලවාගනිති. වඩා වැදගත් වන්නේ තාක්ෂණය (නැට්ට) බවත් පරිශීලකයින් (බල්ලා) එයට හැඩ ගැසිය යුතු බවත් මෙම අඳබාලයින් කල්පනා කරති. ඒ අනුව නැට්ට මගින් බල්ලා වැනිය යුතු අතර නැට්ට කියන ආකාරයට බල්ලා කල යුතුය. එසේ සිහින දකින මොවුන් අමතක කරන, එමනිසා වෙනත් කිසිම දෙයක තර්කයක් නොදැකීමට හේතුවන, කරුණ වන්නේ සියළු තාක්ෂණයන් බිහි වන්නේ මිනිසුන්ගේ අවශ්‍යතාවයන් තෘප්තිමත් කිරීමට බවයි. මනුෂ්‍යත්වය පවතිනු ඇත. තාක්ෂණයන් වෙනස් වනු ඇත. තීරණ ගන්නන් හට අවබෝධ කර ගැනීමට ඉතාමත් අපහසු වනනේ මෙයයි. තාක්ෂණික ඔළු ගෙඩි තාක්ෂණයත් සමාජයත් යන ප්‍රපංච දෙකම අවබෝධ කර ගත් දිනට තත්වය වෙනස් වනු ඇතැයි අපි බලාපොරොත්තු වන්නෙමු.

11 thoughts on “නගුට විසින් බල්ලා වැනීම හෙවත් අපේ කාලයේ අන්දරේලාගේ කතාව

  1. ඉතාම නරක ඛේදවාචකය නම් බල්ලාගේ වලිගය යකඩ අතකින් මිරිකාගෙන සිටීමයි. එම යකඩ අත විසින් බල්ලාගේ වලිගය විටෙක තදින් මිරිකයි. විටෙක විවිධ පැතිවරලට කරකවනු ලබයි. මේ හැම අවස්ථාවකදීම ඒ ඒ අනුව බල්ලාට නැටීමට සිදුව තිබීම මේ යුගයේ යථාර්ථයයි.

  2. >“සම්මතයන් තිබිය යුතුය. විවිධ වූ තාක්ෂණික පසුබිම් මත පොදු සන්නිවේදනය මාධ්‍යයක් තනා ගැනීමට එය උදව් වේ. අවශ්‍යතාව එයයි. සන්නිවේදනයයි. සම්මතය ඒ සඳහා විසඳුමක් පමණි. යුනිකේත සම්මතයක් බව සැබෑය. නමුත් පින්තූරයක් මත ලියූ කවියක් සිංහල කියවීමට හැකි අයෙකුට කියවා ගත නොහැකි වීමට හේතුවක් නොමැත. එම නිසා සන්නිවේදනයට ඇති එකම මාධ්‍ය සම්මතය නොවේ.”<

    true.

  3. යුනිකෙත සම්මතයක් ලෙස ප්‍රචලිත කිරීම යහපත් කාරණයකි. එය සන්නිවෙදනය පහසු කර ගැනීම උදෙසා නිතැකවම ප්‍රයෝජනවත් වනු ඇත.
    පින්තූරයක් මත ලියනු ලැබූ කවියක් කියවීමද සිනහල දන්නා සැමට කල හැකිය.
    සන්නිවෙදනයට බාධාවක් දෙවිදියෙන්ම අත් නොවේ. අවැසි සන්නිවෙදනය ඉන් සිදුවෙ. නමුත් යුනිකෙත ප්‍රචලිත කිරීමට පින්තූරයක් මත ලියා පළ කිරීම බාධා ගෙන දෙයි. මන්ද යත් පින්තූරය කියවීමට යුනිකෙත හෝ වෙනත් දෙයක් අවැසි නොවන බැවින් පහසුවෙන් කියවාගත හැකි වීමයි. ඉන් සිදුවන අකටයුත්ත නම් සම්මතය ලෙස සින්හල අකුරක් අන්තර්ජාලයට එක් නොවීමයි. ඉතින් නකුට විසින් බල්ලා වැනිය යුතුද යන්න නැවත සිතා බැලිය යුතුය..ඊට ඉඩ සැලසූ මෙම ලිපියට මාගෙ ස්තූතිය.

  4. It is the duty of the host to make their guests feel at home; but it is the duty of the guests to remember that they are not.

    ඉහත ප්‍රකාශය කවුරු විසින් කරන ලද්දක්ද එය මගේ මතකයට එක්වුනේ කවදා කොහේදීද යන්න මට පැහැදිලිව මතක නැතත් මේ උද්ගත වී ඇති තත්වය වඩාත් හොඳින් පැහැදිලි කරන්නේ එය බව මගේ හැඟීමයි. සිංහල බ්ලොග් කරුවන්ගේ සංගමය යනු කිහිප දෙනෙකු විසින් ඔවුනගේ යම් අවශ්‍යතාවයන් මත සංවිධානය කරගත් එකක්. එයට එක් වීමට අන් අයටත් ඔවුන් ඉඩදී තිබෙනවා. සංසදයේ පරිපාලකවරුන්ගේ නීති රීති සහ සම්මතයන්ට එකඟව කටයුතු කරන් තාක් කල් ඕනෑම අයෙකුට සංසදය තුල ‘ගෙදර වගේ’ ඉන්න පුලුවන්. ඒත් ඒවාට එරෙහිව යන අය සංසදයෙන් නෙරපෙනවා. මෙහිදී සංසදයේ පරිපාලකවරුන් ‘බල්ලා’ වන අතර සෙසු සාමාජිකයන් වන අපි ‘නගුට’ විය යුතුයි. අප ඒ බව තේරුම් ගෙන බල්ලාට උවමනා අතට වැනෙන්නට සූදානම් විය යුතුයි. එසේ නොමැති නම් අපට හිතුවක් කල හැකි වෙනත් කන්ඩායමක් පිහි‍ටුවා ගත යුතුයි. Google හෝ Yahoo කන්ඩායම් තුල තිබෙන නීතිය මා දන්නා තරමට එයයි. නිවසේදී හෝ සේවා ස්ථානයේදි වුවත් මේ නීතිය එසේම බව අපි දන්නවා. අම්මා තාත්තා කියන විදිහට ඉන්න බැරිනම් කරන්න තියෙන්නේ ගෙදරින් යන එකයි. boss කියන විදිහට ඉන්න බැරිනම් කරන්න තියෙන්නේ ඉල්ලා අස්වී වෙනත් ‍රැකියාවක් හොයා ගන්නා එකයි. මෙහිදී අම්මා, තාත්තා හෝ boss හරිද වැරදිද, සාධාරනද අසාධාරනද යන්න මතභේදයට තුඩුදෙන, නිරපේක්ෂ නොවන කරුනක්…. මා හිතන්නේ තව දුරටත් කරුනු නොකීවත් මා කියන දෙය ඔබට පැහැදිලි ඇති. මෙය කිසිදු පාර්ශ්වයකට බර නොවී, ගැති නොවී ඉදිරිපත් කල මගේ පෞද්ගලික මතයයි. මගේ අදහස් සාවද්‍යනම් සමාවී වරද පෙන්නා දෙන්න.

  5. ලිපිය කියවා නිහඬතාවය රකිමින් අහක බලා ගෙන නොගොස් අපහට විරුද්ධ හෝ අදහස් දැක්වීම පිළිබඳව අපි ප්‍රභාත්ටත් සිංහටත් ස්තූතිවන්ත වෙමු.

    ප්‍රභාත්ට නැවතත් අපගේ මතය මතක් ‍කර දෙනවා නම්,
    නිර්මාණ පැවතිය යුත්තේ යුනිකේත පමණක් ලෙසින් යැයි යන්න අපගේ විශ්වාසය නොවේ. ශාස්ත්‍රීය දැනුමත් වෙනත් තාක්ෂණික දැනුමත්, කාලීන, දේශපාලන හා සමාන ක්ෂේත්‍රයන්හි අන්තර්ගතයන් එසේ යුනිකේත වලින් පැවතීම අත්‍යවශ්‍ය වේ. ඒ එම අන්තර්ගතයන් තුලින් හැඟවෙන දේ ලබා ගන්නේ කියවීමෙන් පමණක් නිසාවෙනි. අතරින් පතර පින්තූරයක් හෝ එවැනි යමක් යොදා තේරුම වඩාත් තීවර්‍ කල හැක. නමුත් අවධානය වඩා යොමුවන්නේ කියවිය හැකි අකුරු වෙතටයි.
    නමුත් කවියක් හෝ එවැනි කලා නිර්මාණයක තේරුම ලබා ගැනීමට පින්තූරයක් මගින් සිදුවන කාර්යභාරය ඉහත සඳහන් ක්ෂේත්‍රවලට වඩා විශාල වේ. තවද නූතන මාධ්‍ය තුල නිර්මාණයක් තව දුරටත් අකුරු තුලට පමණක් කැටි කිරීමේ අවශ්‍යතාවයක් නොමැත. තාක්ෂණයේ අරමුණ විය යුත්තේ මෙම නිර්මාණ වුවත් වැඩි ප්‍රේක්ෂක සමුදායක් වෙතට ගෙන යාමට පහසුකම් සලසා දීමයි. එමෙන්ම සිංහල බ්ලොග්කරුවන් ලෙස අප එවැනි නිර්මාණකරුවන් හලා “මෙතන ඕව බෑ. තොපිට ඕනෙ නම් වෙන එකක් හදා ගනින්” යැයි පවසා යුනිකේත පමණක් යැයි දොඩමින් යකා නැටිය යුතුද?

    අනෙක් කාරණය, පින්තූරයක් මත කවි ලිවීමෙනුත් හා ඒවා වැඩි කියවන්නන් ප්‍රමාණයකට විවෘත කිරීමෙනුත් යුනිකේත ජනප්‍රිය භාවයෙන් අඩුවන්නේ ඇයි ද යන්න අපට නොවැටහේ. අප අත්විඳ ඇති ආකාරයට කවියක් (උදාහරණයකට) යුනිකේත වලින් ලිවීමට වඩා වැඩි වෙහෙස මහන්සියක් එය පින්තූරයක් මත අර්ථ දැක්වීමට දැරිය යුතුය. එනයින් ඉහත ලිපිය වැනි යමක් (උදාහරණයකට) පින්තූරයක් මත හෝ සමහරුන් කියනා ආකාරයට ඇස්කි (ASCII) වලින් ලිවීමට කවුරුන් හෝ කැමැත්තෙන් ඉදිරිපත් වේ යැයි සිතිය නොහැක. මෙය අප දකිනා ආකාරයට Y2K වැනි බොරු භීතිකාවකි. අප කල යුත්තේ යුනිකේත ස්ථාපනය හා භාවිතය ප්‍රචාරණය මිස යුනිකේත නොවන සියල්ල තහනම් කිරීම නොවේ.

    වැදගත්: අප දන්නා ආකාරයට යුනිකේත රජයේ ආයතන තුල ප්‍රචලිත කිරීමට ඇති බාධකය පින්තූර මත ලිවූ කවි නොවේ!

    සිංහ,
    ඔබ කියනා ආකාරයේ දෙයක් දැනටම සිදු වී ඇති බව ඔබ නොදන්නවා විය හැක. දැනටම නිදහස් සිංහල බ්ලොග්කරුවන් පෙස වෙනම සංගමයක් සෑදී ඇත.

    වඩ වඩාත් ඇදීයන ලෙස විස්තර කල හැකි මුත් ‍ඔබ කියනා දෙය මෙසේ ප්‍රශ්න කරමි. ප්‍රභාකරන් ඇතුළු කොටි සංවිධාන හා එවැනි වෙනත් බෙදුම්වාදීන්ගේ තර්කයන් අතරත් ඔබගේ තර්කයන් අතරත් ඇති වෙනස (ඉතාමත් සරල මට්ටමකින්) පැහැදිලි කල හැකි ද?

    අප දන්නා ආකාරයට සිංහල බ්ලොග් ලියනා හා කියවනා පරිශීලකයන් ප්‍රමාණය දිනෙන් දින වැඩි වෙමින් පවතී. එවැනි දෙයක් මධ්‍යගත නොකර සී සී කඩ කඩා දමා, “කවි කියවන එවුන් මෙහේ එන්න”, “දේශපාලනය කියවන එවුන් මෙහේ එන්න”, “ජොලි කියවන එවුන් මෙහේ එන්න” ලෙස බෙදා දැමීමේ තර්කය කුමක්ද? “ඉන්න බැරි නම් පල” න්‍යාය ඉතාමත් ලෙහෙසි පහසු පළමුවෙන්ම සිතට එන දෙයයි. නමුත් අප බලාපොරොත්තු වන්නේ එවැනි ආවේගකාරී අවසානයක් නොව පුළුල් වූ ඉලක්ක ගොඩනගා ගත් අන්තර්ජාලය තුල සිංහල යැයි හඬ නැගිය හැකි එක්කහු වීමකි. නුදුරු දිනක තවත් අවශ්‍යතා ඇති පිරිසක් ඒ වෙනුවෙන් හඬ නඟනු ඇත. ඔබේ තර්කය පිළිපදිමින් ඔවුන් වෙනම සමූහයක් ගොඩ නගා ගනු ඇත. අවසානය දුටුවාද?

    අවසාන ලෙස ඔබ දෙපළටම කියවිය හැකි මෙම කවිය ඉදිරිපත් කරමි. මෙහි නිර්මාණ කරු නමින් ප්‍රසාද් වීරසේ‍කර (වීරයා) වේ. පහත නිර්මාණය යුනිකේත නොවන අතර සමහර බක පණ්ඩිතයන්ට අනුව එම නිසා සිංහලද නොවේ. මෙවැනි නිර්මාණ සිංහල කියවන කියවීමට කැමති ප්‍රේක්ෂකයින්ගෙන් උදුරා ගැනීම තර්කානුකූල නොවේ යැයි අපි සිතමු.

    http://www.theopen.chamiladealwis.com/wp-content/uploads/2010/01/kavi4-02.jpg

  6. හිතවත් පිටස්තරයානෙනි, මුලින්ම කිව යුත්තේ මා මගේ අදහස ප්‍රකාශ කලේ කිසිවෙකුට විරුද්ධව නොවේ; පක්ෂවද නොවේ. මට කිසිවෙකු සමග කිසිදු තර්කයක්ද නැත. කලක සිට දිගින් දිගටම ඇදී ගිය විවාදයක පසෙකින් සිට බලා හිඳ, එම විවාදයට සහභාගි වන්නවුන්ට නොපෙනෙතැයි මට සිතුනු දෙයක් අහිංසක ලෙස පෙන්නා දුන්නා පමනි. එකට එක්ව බොහෝ ප්‍රයෝජනවත් දේ කල හැකි පිරිසක් කුමන කරුනක් නිසා හෝ භේද භින්න වී කුඩා කන්ඩායම් වලට බෙදී යාම මම කිසිසේත් අනුමත නොකරමි. මා කීවේ එසේ කරන්නට කියාත් නොවේ. පවතින තත්වය මත වෙන කරන්නට දෙයක් නැති බව පමනකි. අකැමැත්තෙන් වුව එම ප්‍රායෝගික සත්‍යයට එකඟ වන්නට සිදුවී ඇති බව මෙතෙක් මා සැබවින්ම නොදැන සිටි නිදහස් බ්ලොග් කරුවන්ගේ සංසදයෙහි බිහිවීම සාක්ෂි දරයි. පිටස්තරයානෙනි, මා කියූ දෙය සැබෑ වුවා යැයි කාළකන්නි සතුටක් විඳීමට මට මෙහිදී කොහෙත්ම නුපුලුවන. සහෝදර පිරිසක් බෙදී වෙන්වී යාම කණගා‍ටුවට කරුණකි. ඔව්, මම අවසානය දු‍ටුවෙමි. මේ අවසානය නොවන බවද දු‍ටුවෙමි.

    ප. ලි.
    වීරයාගේ නිර්මානය විශිෂ්ඨයි. එය යුනිකෝඩ් වලින් පමණක් කිසිසේත් කල හැක්කක් නොවේ. එය සිංහල නොවන්නේද නොවේ. සිංහල පාඨකයිනට එවන් නිර්මාණ රස විඳ නිර්මාණශීලී රුචිකත්වයක් වර්ධනය කර ගැනීමට ඇති අවස්ථාව කුමන හේතුවක් නිසා හෝ අහිමිවී යයි නම් එය ඛේදයක් බව මම ඉඳුරාම පිළිගනිමි. එහෙත්….

    • එසේනම් ඔබත් අපත් අතර එකම වෙනස ප්‍රායෝගික සත්‍යයන්හි පමණි. අපි වෙනස මත බලාපොරොත්තු තබා බලමු.

  7. Pingback: සිංහල බ්ලොග්කරණය කොයිබටද? – Out In The Open